اسلام آباد (سہ پہر) تھانہ کورال پولیس کی بڑی کارروائی، سٹریٹ کرائم میں ملوث دو گروہوں کے پانچ ملزمان گرفتار

اسلام آباد (سہ پہر) تھانہ کورال پولیس کی بڑی کارروائی، سٹریٹ کرائم میں ملوث دو گروہوں کے پانچ ملزمان گرفتار

تھانہ کورال پولیس نے سٹریٹ کرائم کے خلاف بڑی کارروائی کرتے ہوئے دو مختلف جرائم پیشہ گروہوں کے پانچ ملزمان کو گرفتار کر لیا۔ کارروائی کے دوران ملزمان کے قبضے سے لاکھوں روپے مالیت کا چھینا گیا سامان، نقدی، 10 قیمتی موبائل فونز، دو موٹر سائیکلیں، وارداتوں میں استعمال ہونے والا اسلحہ اور ایمونیشن برآمد کر لیا گیا۔
پولیس کے مطابق گرفتار ملزمان شہریوں سے اسلحے کے زور پر موبائل فون، نقدی اور دیگر قیمتی اشیاء چھیننے کی متعدد وارداتوں میں ملوث تھے۔ ایس ایچ او عامر حیات کی سربراہی میں تشکیل دی گئی خصوصی پولیس ٹیم نے جدید تفتیشی طریقہ کار اور انٹیلی جنس معلومات کی بنیاد پر کامیاب کارروائی کرتے ہوئے دونوں گروہوں کے پانچ ارکان کو گرفتار کیا۔
پولیس حکام کا کہنا ہے کہ برآمد ہونے والا اسلحہ مختلف جرائم میں استعمال کیا جاتا تھا، جبکہ مسروقہ موبائل فونز، نقدی اور دیگر سامان بھی قبضے میں لے کر قانونی کارروائی کا آغاز کر دیا گیا ہے۔ گرفتار ملزمان سے مزید تفتیش جاری ہے تاکہ ان کے دیگر ساتھیوں، سہولت کاروں اور مزید وارداتوں کے بارے میں معلومات حاصل کی جا سکیں۔
اسلام آباد پولیس نے اس عزم کا اعادہ کیا ہے کہ وفاقی دارالحکومت میں سٹریٹ کرائم، ڈکیتی اور دیگر جرائم میں ملوث عناصر کے خلاف بلاامتیاز کارروائیاں جاری رہیں گی اور شہریوں کے جان و مال کے تحفظ کو ہر صورت یقینی بنایا جائے گا۔
علاقہ مکینوں اور شہریوں نے تھانہ کورال پولیس اور ایس ایچ او عامر حیات کی اس کامیاب کارروائی کو سراہتے ہوئے امید ظاہر کی ہے کہ ایسے مؤثر اقدامات سے علاقے میں امن و امان کی صورتحال مزید بہتر ہوگی۔