راولپنڈی (سہ پہر) راولپنڈی میں جرائم پیشہ عناصر اور لینڈ مافیا کے خلاف بڑے کریک ڈاؤن کی تیاری، سی سی ڈی نے نئی فہرستیں تیار کر لیں۔ ذرائع

راولپنڈی (سہ پہر) راولپنڈی میں جرائم پیشہ عناصر اور لینڈ مافیا کے خلاف بڑے کریک ڈاؤن کی تیاری، سی سی ڈی نے نئی فہرستیں تیار کر لیں۔ ذرائع

راولپنڈی: ذرائع کے مطابق کرائم کنٹرول ڈیپارٹمنٹ (سی سی ڈی) نے راولپنڈی میں سرگرم مبینہ جرائم پیشہ عناصر، بدمعاشوں، لینڈ مافیا اور دیگر مطلوب افراد کے خلاف بڑے پیمانے پر کارروائیوں کے لیے نئی فہرستیں تیار کر لی ہیں۔ اطلاعات ہیں کہ ان فہرستوں کی بنیاد پر جلد مختلف علاقوں میں ٹارگٹڈ آپریشنز کا آغاز کیا جا سکتا ہے۔

دوسری جانب، سی پی او راولپنڈی حسن مشتاق سکھیرا نے چارج سنبھالنے کے بعد سی سی ڈی ریجنل آفس کا پہلا دورہ کیا، جہاں ریجنل آفیسر سی سی ڈی حسن جہانگیر وٹو نے انہیں ادارے کی کارکردگی، جاری آپریشنز اور مستقبل کی حکمت عملی پر تفصیلی بریفنگ دی۔

ذرائع کے مطابق ملاقات کے دوران راولپنڈی میں سرگرم مبینہ لینڈ مافیا اور دیگر جرائم پیشہ افراد کی نئی تیار کردہ فہرستوں اور ان کے خلاف مشترکہ کارروائیوں پر بھی تبادلہ خیال کیا گیا۔ اس موقع پر راولپنڈی پولیس اور سی سی ڈی کے درمیان باہمی تعاون کو مزید مؤثر بنانے پر اتفاق کیا گیا۔

سی پی او حسن مشتاق سکھیرا نے بہترین کارکردگی کا مظاہرہ کرنے والے سی سی ڈی افسران میں تعریفی اسناد تقسیم کیں اور ان کی پیشہ ورانہ خدمات کو سراہا۔ اپنے خطاب میں انہوں نے کہا کہ کرائم کنٹرول ڈیپارٹمنٹ اور راولپنڈی پولیس کے درمیان مؤثر کوآرڈینیشن سے جرائم کی روک تھام میں نمایاں مدد ملے گی۔
انہوں نے مزید کہا کہ راولپنڈی پولیس اور سی سی ڈی جرائم پیشہ عناصر کے خلاف مشترکہ حکمت عملی کے تحت کام کریں گے، جبکہ سی سی ڈی کی مؤثر کارکردگی سے پنجاب بھر میں جرائم کی شرح میں کمی آئی ہے۔ سی پی او نے افسران پر زور دیا کہ وہ مربوط انداز میں جرائم پیشہ افراد کی بیخ کنی اور شہریوں کے جان و مال کے تحفظ کو یقینی بنائیں۔
دورے کے اختتام پر سی سی ڈی کی جانب سے سی پی او حسن مشتاق سکھیرا کو اعزازی شیلڈ بھی پیش کی گئی۔ اس موقع پر ڈی ایس پی مرزا جاوید اقبال سمیت دیگر سینئر افسران بھی موجود تھے۔

نوٹ: جرائم پیشہ افراد کی نئی فہرستوں اور مجوزہ کارروائیوں سے متعلق بعض معلومات ذرائع سے منسوب ہیں، جن کی سرکاری طور پر باضابطہ تصدیق ہونا باقی ہے۔